तुलसीपुर उपमहानगरपालिकाद्धारा लैंगिकमैत्री संचार नीति बनाउने प्रतिवद्धता, मस्यौदा समिति गठन
दाङ,
तुलसीपुर उपमहानगरपालिकाद्धारा लैंगिकमैत्री संचार नीति बनाउने प्रतिवद्धता जनाएको छ । सञ्चारिका समुह, नेपालको आयोजनामा स्थानीय तहमा संचार नीतिको आवश्यकता र लैंगिक एवं सामाजिक समावेशीकरणमैत्री संचार माध्यम निर्माणमा स्थानीय तहको भूमिका विषयक छलफल कार्यक्रममा तुलसीपुर उपमहानगरपालिका प्रमुख नगरप्रमुख टीकाराम खड्काले लैंगिकमैत्री संचार नीति बनाउने प्रतिवद्धता जनाएका हुन् ।उनले सेवा प्रवाहलाई लैंगिक र सामाजिक समावेशीकरणमैत्री बनाउँदै लैजाने समेत बताए । विभिन्न नीति, योजना तथा कार्यक्रम आदिको निर्माण तथा विष्लेषणको लागि आवश्यक तथ्यांक संकलन तथा सर्वेक्षणको कार्यक्रमलाई प्राथमिकता दिइने बताए । आफ्नो पालिकामा कार्यदल गठन गरेको र कार्यदल र पालिका बिचमा समन्वय गरेर काम अगाडि बढाउने उनको भनाइ थियो। समाजका अन्य निकायजस्तै सञ्चार क्षेत्रलाई पनि प्रोत्साहन र नियमन गर्ने निकाय स्थानीय सरकार नै भएकोले त्यसका लागि आवश्यक नीति नै निर्माण गरेर अघि बढ्न कार्यदल गठन गरिएको नगरप्रमुखले बताए ।
संचारिका समूह नेपाल लुम्बिनी प्रदेशका अध्यक्ष अमृता अनमोलले स्थानीय तहमा महिलाले चलाएका संचारमाध्यमलाई प्राथमिकतामा राख्न स्थानीय सरकारलाई आग्रह गरिन्। सञ्चारिका समूहले आयोजना गरेको कार्यक्रममा उनले तुलसीपुरमा भएका संचार माध्यममा महिलाको भूमिका, उनीहरुले अनुदानको कार्यक्रम पाए नपाएको निगरानी उपमहानगरले गर्नुपर्ने बताइन् ।
संचार क्षेत्रमा काम गर्ने महिलाले सुत्केरी बिदा नपाउने, थोरै तलबमा काम गर्नुपर्ने बाध्यता, महिलालाई अवसर नदिने, पुरुषहरु मात्रै अगाडी सर्ने परम्परा रहेकाले स्थानीय सरकारले नीति बनाएर काम गर्नुपर्ने उनको भनाइ छ ।
यस्तै पत्रकार सुशील बस्नेतले समाज परिवर्तनको काम पत्रकारहरुले गदै आएको बताए । उनले अहिले पनि समाजमा पछि परेका वर्गका हकहितका लागि पत्रकारले कलम चलाउदै आएको बताए । विशेषगरी महिलाहरुले नै महिलाका समस्याका कुरा, सफलताका कुरा बाहिर ल्याएमा प्रभाबकारी हुने उनको भनाइ थियोे । राष्ट्रिय समाचार समिति दाङका प्रमुख नारायणी रजौरेले महिलालाई अवसर दिए राम्रो काम गर्ने बताइन्। उनले महिलाले दोहोरो भूमिका निभाउनुपर्ने भएकाले थप समय दिनुपर्नेमा जोड दिईन् ।
तुलसीपुर उपमहानगरका प्रेस संयोजक गणेश आचार्यले स्थानीय तहमा संचार नीति र लैंगिकमैत्री संचार संस्था हुन आबश्यक रहेको बताए । उनले पहिलो पटक तुलसीपुृरले मिडियाको वर्गिकरण गर्न थालेको बताए । लोककल्याणकारी विज्ञापनमा रेडियो, टेलिभिजन, अनलाईन र पत्रपत्रीका सूचीकरण गरेकालाई मात्रै छनोट गरिने बताए ।
सञ्चारिका समूहले आयोजना गरेको स्थानीय तहमा संचार नीतिको आवश्यकता र लैंगिक एवं सामाजिक समावेशीकरणमैत्री संचार माध्यम निर्माणमा स्थानीय तहको भूमिका विषयक छलफल कार्यक्रमको सहजीकरण संचारिका समूह नेपाल दाङका अध्यक्ष रञ्जिता अधिकारीले गरेकी थिइन् । तुलसीपुर क्षेत्रका सञ्चारकर्मी, सम्पादक र प्रकाशकको उपस्थिति रहेको थियोे ।
.
