उथलपुथलमै रुचि राख्ने प्रधानमन्त्री र अर्थतन्त्र सुधार गर्ने ‘आइडिया’ सहित भित्रिएका अर्थमन्त्रीले बाढीयुक्त नदीमा रुमल्लिएको अर्थतन्त्रको डुंगालाई नदीपार गर्न सक्लान् ? संभवतः प्रधानमन्त्रीका लागि त यो अन्तिम अवसर हो नै, अर्थमन्त्री पुनका लागि पनि यो निर्णायक अवसर हुनेछ ।
अघिल्लो साता मुलुकको राष्ट्रिय राजनीतिमा अप्रत्यासित हलचल पैदा भयो । कहींकतै स्पष्ट संकेत र पूर्वानुमान विना नै दलहरूबीच नयाँ राजनीतिक समीकरण बन्यो । सरकारको नेतृत्व गरिरहेको नेकपा माओवादी केन्द्रका अध्यक्ष एवम् प्रधानमन्त्री पुष्पकमल दाहाल प्रचण्डले वर्तमान संसद्को सबैभन्दा ठूलो सत्ता सहयात्री दल नेपाली कांग्रेसलाई चक्मा खुवाउँदै नयाँ समीकरण बनाए ।
