(नेपालगन्ज)
बाकेको नेपालगन्ज उपमहानगरपालिका वडा नम्बर १, धम्बोझीमा प्रथम आन्तरिक भेट्रान र खुल्ला ब्याडमिन्टन प्रतियोगिता प्रथम आन्तरिक भेट्रान ब्याडमिन्टन प्रतियोगिताको उपाधि रमेश श्रेष्ठ र टेक बहादुर गुरुङले जितेका छन् । खुल्लातर्फ कमल देवकोटा र अज बहादुर शाहीको जोडी प्रथम भएको हो ।
नेपालगन्ज उपमहानगरपालिका वडा नम्बर १ स्थित धम्बोझी ब्याडमिन्टन प्रशिक्षण केन्द्रले आयोजना गरेको ५० वर्षमाथिको भेट्रान प्रतियोगितामा रमेश र टेकको जोडीले किशोर आचार्य र ऋषिजंग शाहको जोडीलाई २१–११, २१–१२ अंकको सोझो सेटमा पराजित गर्दै उपाधि जितेको हो ।
उपाधिसंगै रमेश र टेकको जोडीले ७ हजार रुपैयँ पुरस्कार पाएको छ । द्वितीय भएको किशोर र ऋषिजंगको जोडीले ५ हजार पाएको छ । भेट्रानमा जनार्दन रत्न मल्ल र अर्जुन खड्का तथा भोलानाथ सिटौला र अर्जुन रानाको जोडीले तृतीय हुदै दुई–दुई हजार पाएका छन् ।
खुल्लातर्फ कमल र अज बहादुरको जोडीले पवन चौधरी र बुद्धि लाल श्रेष्ठको जोडीलाई २–१ को सेटमा पराजित गर्दै उपाधिसहित ७ हजार जितेको छ । पहिलो सेट २१–१२ अंकले जितेको कमल र अज बहादुरको जोडी दोस्रो सेटमा २१–१२ मै पराजित भएको थियो । तेस्रो सेट २१–१३ ले जित्दै कमल र अज बहादुरको जोडी प्रथम भयो ।
द्वितीय भएको पवन र बुद्धि लालको जोडीले ५ हजार पुरस्कार पायो । खुल्लामा सन्दीप चौधरी र मनु गुप्ता तथा सन्तोष शाही र मदनराज उपाध्यक्षको जोडी तृतीय भयो । तृतीयले दुई हजार पुरस्कार पाए । प्रतियोगिताका विजेताहरुलाई नेपालगन्जका मेयर प्रशान्त विष्ट, प्रमुख जिल्ला अधिकारी खगेन्द्र रिजाल, एसपी तुलबहादुर कार्की, वडा नम्बर १ का अध्यक्ष प्रमोद रिजाल लगायतले पुरस्कार वितरण गरे ।
प्रशिक्षण केन्द्रका अध्यक्ष जनार्दनरत्न मल्लका अनुसार, ५० वर्षमाथिको भेट्रानमा २० र खुल्लामा २६ टिमको सहभागिता रहेको थियो ।
एक करोड १५ लाख बढीमा बनाइएको धम्बोझीको ब्याडमिन्टन प्रशिक्षण केन्द्रमा बालबालिकालाई नियमित प्रशिक्षण दिने गरिन्छ । नियमित अभ्यास गर्न आउनेसंग केन्द्रले थोरै शुल्क लिने गर्दछ । केन्द्रले त्यसका लागि प्रशिक्षकको पनि ब्यबस्था गरेको छ ।
